O 12 de maio celebrouse na Facultade de Ciencias da Educación o Día Escolar das Matemáticas. Para esta conmemoración propuxéronse dous obradoiros na entrada da facultade, nos que o alumnado e o profesorado puido coñecer e elaborar mosaicos e superficies regradas. Así mesmo, empregando a realidade aumentada, puideron experimentar como usar superficies sinxelas para reproducir figuras da realidade. Neste caso, seguindo a temática deste ano, vimos varias figuras representativas do Camiño de Santiago, deseñadas polo alumnado do 2º curso do Grao en Mestra de Educación Primaria.
Pola tarde puidemos comprobar como as Matemáticas non se restrinxen só a números, contas e operacións da man de Sofía Cendán, que nos mostrou como empregar a música como escusa para aprender estatística ou aritmética.
