Olimpíada Matemática de 2ºESO

Entre as actividades máis consolidadas que organiza a Asociación Galega do Profesorado de Matemáticas (AGAPEMA) figura a  Olimpíada Matemática de 2ºESO (https://www.agapema.org/olimpiada), a través da cal se pretende promover o gusto pola resolución de problemas matemáticos e o desenvolvemento de destrezas de pensamento ligadas ás matemáticas que non sempre son atendidas nas aulas ordinarias. Nos últimos anos, a organización da Olimpíada recaeu no grupo de AGAPEMA da zona de Lugo. Nel participan algúns teselad@s. Outras colaboran en Santiago na organización da fase de zona.

Aínda que na edición de 2021 non foi posible devido ás restricións sanitarias, para a fase final habitualmente organízase unha dobre xornada: pola mañá celébrase a proba de resolución de problemas no Círculo das Artes de Lugo e pola tarde (logo dunha comida para confraternizarmos) o alumnado participante desfruta  dalgunha actividade lúdico matemática, ao estilo dun paseo matemático ou unha xincana matemática.

O alumando participante con mellor desempeño na fase final é seleccionado para participar despois na fase estatal, que se celebra cada ano nunha cidade española.

Na web de AGAPEMA (https://www.agapema.org/olimpiada) poden descargarse os problemas dos últimos anos e as súas solucións.